Darr

Tumse door jaane se dil ghabrata bhi hai

Jaise kisi surkh bageeche mein patjhad aa jaaye;

Jaise koi toofaani thapedon se

gharon mein tabaahi macha jaaye;

Haan, 

tumse door jaane se dil ghabrata hai,

Raaton ki neend toh jaise ek sundar sapna 

ban ke reh gayi ho,

Tumhari bachkaana hasi ne 

hoton ko hasne pe 

majboor sa kar diya ho;

Kahan jaau main tumse door?

Kyun jaau main tumse door?

Tum toh kabhi paas the hi nahi;

Bas ek yaad the:

Sapne jaise

jaise kisi dhue mein lipti hui chingari 

Rangon se roshan kar deti hai

gharon ki parchayion ko;

Jab tak woh laal-naarangi rang

Raakh na ho jaayein,

Kaise chali jaau tumse door?

Jin aankhon mein apna astitva dekha tha

un aankhon se kaise aankhein churau?

Pyaar shabd se dil ghabrata hai ab

Tumhari hasi pe vishwaas karu ya tumhari gayab hasti pe?

©Geetakshi Arora

19 October 2014